Vaahaka2

އަބަދުވެސް ގާތުގައި ވާނަމެވެ....

       ގެއަށް ވަތްތަނާހެން އަފާޒުގެ ގޭގައި މަސައްކަތް ކުރަން އުޅޭ ބިދޭސީ މީހާއައިސް އޭނާއަށް ސިޓީ އެއް ދިއްކޮށްލިއެވެ. އަފާޒު އޭގައި ހިފައި ސިޓީ އުރައިގެ ދެފަރަތް ބަލާލިއެވެ. ނަމެއް ނެތުމުން ބާވަންގަސްތުކުރިޔަސް ބޭއިޙްތިޔާރުގައި އެކަނޑާލާފައި ކިޔަން ފެށިއެވެ.  

 ލޯބިވާ އަފާޒަށް

ހެޔޮ ދުޢާއާއި ސަލާމަށްފަހު ލިޔަމެވެ.

އަފާޒުއެވެ. މިއީ ފަހަރެއްގައި އަފާޒަށްޓަކައި އަހަރެންގެ ޤަލަމުން ބޭރުކޮށްލާ އެންމެ ފަހު ދެލި ކޮޅަށްވެސް ވެދާނެއެެވެ. މިއީ އަފާޒަށްޓަކައި އަފާޒުުގެ ލޯބީގައި ދީވާނާވި އަހަރެންގެ ހިތް އަފާޒަަށް ޚާއްސަ ކުރާ އެންމެ ފަހު ލިޔުން ކަމަށް ވެސް ވެދާނެއެވެ.

       އަފާޒަށް އެނގޭހެއްޔެވެ؟ އަހަރެން އަފާޒުދެކެ އިންތިހާ އަށް ލޯބިވެއެވެ. އަމިއްލަ ނަފްސަށް ވުރެ ބޮޑަށެވެ. އެއީ އަޖައިބުން ފުރިގެންވާ ޖާދޫއެއް ކަހަލަ ލޯބެކެވެ. އެހެންނޫނަމަކަ އަފާޒުގެ ހިމޭން އަނިޔާތަށް ލިބިގަންނާކަށް ނޫޅުނީ ހެވެ. އަފާޒުގެ ކުށަކީ އެއީ އެވެ. އަހަރެންނަށް ލޯބި ދަސްކޮށް ދިން ކަމެވެ. އަހަރެންގެ ހިތުގައި ފުން ލޯބެއްގެ ބިންގާ އަޅައިދިން ކަމެވެ.

      
އަހަރެން ލޯބިވާ ކަން އަފާޒަށް ހާމަ ކުރަން ފަސްޖެހުނީ އަހަރެންނާއި އަފާޒުގެ މެދުގައި އޮންނަ ރަޙްމަތްތެރިކަމުގެ ގުޅުން ނިމުނަކަށް އަންނާނެ ކަމުގެ ބިރު ހީވުމުންނެވެ. އަދި އަފާޒުގެ އެންމެ ގާތް އެކުވެރިޔާގެ މަގާމުން އަހަރެން ވަކިކޮށް ފާނެތީއެވެ. އަފާޒުއެވެ. އަހަރެންގެ ހަނުހިމޭން ބަސްމޮށުންތެރިކަމާއި އަމަލުތަކުން އެއްވެސް އެއްޗެށް ދޭހައެއް ނުކޮށްދޭ ހެއްޔެވެ؟ އަފާޒާއި ވާހަކަ ދައްކާއިރު އަފާޒުގެ ސިޚުރުވެރި ދެލޮލުގެ ތެރެއަށް އަހަރެން ޤަރަގު ވެގެން ދާ މަންޒަރު އަފާޒަށް ނުފެންނަނީ ހެއްޔެވެ؟ އަފާޒު އަހަރެންގެ އެންމެ ގާތް ރަޙްމަތްތެރިއަށް ވެހުރެ މިހާ ގިނަ ދުވަސްވީ އިރުވެސް އަހަރެންގެ ހިތުގައި ފޮރުވާފައި މިވާ ލޯތަބެއް ހަމަ ނޭނގުން ހެއްޔެވެ؟ އެތަކެއް ރޭގެނިދި އަހަރެން އަފާޒަށްޓަކައި ނަގާލި ކަން އަހަރެންގެ ދެލޮލުން ހާމައެއް ނުކޮށްދޭހެއްޔެވެ؟

       އެންމެ ފުރަތަމަ އަފާޒު އަހަރެންނާއި ބައްލުވި ދުވަހުވެސް އަހަރެންގެ ހިތް ފުރިގެންއައީ ކީއްވެ ކަމެއް ޚުދު އަހަރެންނަކަށް ވެސް ނޭނގެއެވެ. ތިޔަ ފަން އިސްތަށިކޮޅާއި ތިޔަ އަސަރުގަދަ އަޑު އަހަރެންނަށް ކަމުދަނީ ކީއްވެ ގެން ކަން އަފާޒު އަހަރެންނަށް ބުނެދީ ބަލާށެވެ.

       16 ޖުލައި 2011 މަތިން އަފާޒު ހަދާންވޭހެއްޔެވެ؟ އެއީ އަަޖައިބެއް ކަހަލަ މި ލޯބި ބަލިކަށި ކުރުވި ރެއެވެ. އަހަރެންގާތުގައި ބައިންދައިގެން އަފާޒުގެ ލޯބިވެރިޔާއާއި ބައްދަލުކުރުވި ރެއެވެ. އެރޭ އަހަރެންގެ ކުދިކުދި ވެފައި ވާ ހިތުގެ އެތިކޮޅުތައްވެސް އޮޔާ ވައިގެ ތެރެއަށް ގެއްލުނެވެ. އޭރު އަހަރެން ހިނިތުން ވެލައިގެން އިންނަމަވެސް އެރޭ އަފާޒުގެ ލޯބީގައި ދީވާނާ ވަމުން ދިޔަ މިހިތް ރޮމުން ގެންދިއައެވެ. އަހަރެން ގެ ހިތުގައި އަޅަމުން ދިޔަ ވޭނުގެ އިޙްސާސް އަހަރެންގެ ލޮލުން އަފާޒަކަށް ނުފެނުނެވެ. އަފާޒާށް ފެނުނީ އަހަރެން ތުންފަތު ގައިވާ ހިނިތުންވުމެވެ. ވާނީވެސް އެހެން ތާއެވެ. އެވަގުތު އަފާޒަށް އަހަރެންނަށް ވުރެ ބޮޑަށް އިސްކަމެއް ދެވިފައިވީ އަފާޒުގެ ދިރިއުޅުމަށް އައި ދެތިން ދުވަހުގެ މެހެމާނަށެވެ. އެނގޭހެއްޔެވެ. އެރޭ އަހަރެންގެ ހިތަށް ކުރި އަސަރުން އަހަރެން މަރުވެދާނަމައޭ ވެސް ހިތަށް އަރިއެވެ. ނަމަވެސް އަހަރެންގެ އުންމީދުތަށް އާވީ އަފާޒުގެ ލޯބިވެރިއާ އާއި ވަކިވުމުންނެވެ. އަހަރެންނަށް ކޮންމެ ވެސް ދުވަހަކުން އަފާޒު ލިބޭނެ ކަމަށް ހީކޮށް އަލުން ފޮނި އިންތިޒާރުގެ ދުވަސްތަށް ގުނަން ފެށީމެވެ. ނަމަވެސް އެފަހަރުވެސް އަހަރެން ދެރަކޮށް ރޮއްވާލީއެވެ. އަފާޒުގެ ލޯބަށް ފެންބޮވާގަނެފައިވާ އަހަރެންގެ ހިތް ފުޑުފުޑުކޮށްލީއެވެ.

      އަހަރެންގެ ހިތް ތިޔަ ފުރިހަމަ އިންސާނާއަށް ދަސްނުވީ ކީއްވެގެންެ ބާވައޭ އަހަރެންގެ ހިތަށް އަރައެވެ. އެކުގައި ހޭދަވެގެން ދިޔައީ މަދު ދުވަސް ކޮޅެއްނޫނެވެ. އެތަކެއް އަހަރު ތަކެކެވެ. އަހަރެންގެ ހަޔާތުގައި އެންމެ ހިތްގައިމު އަހަރުތަކެެވެ. އެދުވަސްތަކުގެ ހަނދާންތަށް މުޅީ އުމުރަށްވެސް މިހިތުގައި ވާނެއެެވެ. އެހަނދާންތަށް އަހަރެން ނައްތާލަން ކިތަންމެ މަސައްކަތެއް ކުރިޔަސް އެއީ އަހަރެންނަށް ނާކާމިޔާބު ވާނެކަމެކެވެ.

     އަފާޒު އަހަރެންނަށް އެންމެ ފުރުސަތެއްވެސް ދީބަލާށެވެ. އޭރުން ތިޔަ ހިތް އުފަލުން ފުރާލަދޭނަމެވެ. ދުވަހަކުވެސް އަހަރެންނާއި ވަކިނުވާނެ ވަރަށް ގާތް ކުރާނަމެވެ. އަހަރެން މިހާދުވަސް ވަންދެން މިވީ ލޯބިގެ ފުން ކަން އިޙްސާސް ކޮށްދޭނަމެވެ. އަފާޒު އެންމެ ހިނދު ކޮޅަކަށްވެސް އަހަރެންނަށް ލޯބި ދީބިލާށެވެ. ތިޔަ ތަނަވަސް މޭމަތީގައި އަހަރެންގެ މޫނު ފޮރުވާލަދޭށެވެ. އޭރުން ވޭތިވެދިޔަ ހުރިހާ ދުވަސްތަކެއްގައި އަހަރެންގެ ހިތަށް ލިބިފައިވާ ޒަހަމުތަކަށް ސިފާއެއް ލިބޭނެއެވެ.

         އެދެން ކަލާ މިހިތުގެ އަޑު އަހާލުމަށް ގަޔާވެ ހުރެ ނިކަން ޔާރާ.. މަގޭ ތިއީ ދެދުނިޔެއޭ ފުރަނާއާ ދިރުން މެއޭ.. ބަލާލި ތާކު ނެއްޔާރާ.. ނެތްތާކު ތިބާ މީ މީހެއްނޫން.. މާޒީ ފޮހުލާށޭ ބޭނުންނޫން.. އުފާ އެތަށް މަ ދޭނަން ރޭދުވާ... ހުވާ ކޮށްފާ ބުނަން ލޯބިވޭ.. ކަލާދެކެ އިންތިހާ ލޯބިވޭ.. ހުވާކޮށްފާ ބުނަން ހިތް ގަޔާވޭ.. މިޖާނުދޭނަމޭ ލޯބިން ހުވާ.. މިޖާނު ދޭނަމޭ ލޯބިން ހުވާ..

       މި އެކުވެރިކަމުގެ ގުޅުން ލޯތްބަށް ބަދަލުވާނެ ދުވަހަކަށް އިންތިޒާރު ކުރާނަމެވެ.

އިޙްތިރާމާއި ސަލާމް

އަފާޒު ދެކެ ލޯބިވާ

މިންނު

         މި ސިޓީ ކިޔައިނިމުން އިރު އަފާޒު ވަނީ ހައިރާންކަމެއްގެ ތެރޭގައެވެ. ވާނީވެސް އެހެން ތާއެވެ. ދުވަހަކުވެސް މިންނު އެެފަދަ ނަޒަރަކުން އޭނާ ދެކޭ ނެކަމަށް އޭނާ ހިޔެއްނުކުރެއެވެ. މިންނުގެ އެންމެ ގާތް ރަޙްމަތްތެރިޔާއަށް ވެހުރެވެސް މިންނުގެ ހިތުގައިވާ އެއްޗެެއް ދެނެގަތުމަށް އޭނާ ނުކުޅެދުނީތީ ލަދުގަނެއެވެ.  އަފާޒު އަވެސް ގަތީ މިންނުގެ ގާތަށް ދެވޭ ތޯއެވެ.

       ކުރިޔަށް އަޅަމުންދިޔަ ފިޔަވަޅުތަކަށް ހުއްޓުމެއް އައިސް މިންނުގެ ދެފައި ބިމުގައި ތަތްލީ ފަހަތުން އައި އަޑަކުންނެވެ. ވަގުތުން އޭނާގެ މުޅިހަށިގަނޑު ފިނިވެގެންދިޔައެވެ. އެއީ އަފާޒުގެ ހިތްގައިމު އަޑެވެ. ލަސްލަހުން އެނބުރިލާފައި ބަލާލުމާއެކު ކައިރިވަމުންއައި އަފާޒު ފެނިފައި މިންނުގެ ހަތަރެސްފައި ގަނޑުކޮށްލައިފިއެވެ. މިންނު ވާހަކަ ނުދެށްކި ގެން އުޅެނިކޮށް އަފާޒު ބާރުބާރަށް މިންނު ގެ ގާތަށް އައިސް އޭނާގެ ދެކޮނޑުގައި ހިފާ ކައިރިއަށް ދަމައިގަތް ގޮތަށް މިންނު ގޮސް ތަތްވި އަފާޒުގެ މޭގައެވެ. އަފާޒު އޭނާގެ ބާރުގަދަ ދެއަތުން މިންނު ވަށައިލާފައި އޭނާ ލޯބިވާ ވާހަކަ މިންނު ގާތުގައި ބުންޏެވެ. އަދި މިންނު ގާތު މަަޢާފަށް އެދި އަބަދުވެސް ގާތުގައި ވާނެ ކަމަށް ބުންޏެވެ.

=ފާތިމަތު ސަމާ=